النهاردة اليوم كان ضارب معايا جدااا وكنت حاسة انى مخنوقة جدااا وصعبت عليا نفسى اوووى وحبيت اشغل يومى كله ومركزش فى اى حاجة وبما انى اتعلقت بمسلسل حكايات بنات قولت اسمعه واخلص شغلى وكأن الحزن مصمم يسيطر عليا كانت حلقة وفاه ام أحلام ومع اول مشهد للوفاه وانا ببكى لانى افتكرت جدتى وبنت عمى الله يرحمهم والمسلسل قلب عليا المواجع افتكرتهم وافتكرت اد ايه حياتى مفتقداهم واد ايه كنت بحبهم ومكنتش اتوقع انى اخسرهم فى شهر أد ايه كنت بحب جدتى واد ايه محتجالها فى حياتى محتاجة لحنانها وحبها ودعوتها ليا أد ايه الصدمة كانت كبيرة عليا افتكرت كل حاجة وبالرغم ان انى صعب احفظ ملامح حد الا انى لسه فاكرة ملامحهم فاكرة شكلهم حتى بعد وفاتهم فاكرة كل حاجة لاء عايشة كل لحظة مرت من ساعة ما سمعت خبر وفاتهم لحد ايام العزاء
أد ايه صعب اننا نخسر حد بنحبه خصوصا لو الفراق بالموت وتحس انه صعب او مستحيل تسمع صوتهم تشوف ملامح وشهم ضحتكهم حزنهم بتحن ليهم حتى وقت غضبهم وحزنهم وتتمنى لو يرجعوا حتى لو لحظة علشان تعرفهم اد ايه احنا بنحبهم
ليست هناك تعليقات:
إرسال تعليق